Պրոֆեսիոնալ զբոսավարների հայկական ասոցիացիան փետրվարի 21-ին զբոսավարների մասնագիտական տոնի առթիվ կազմակերպել էր միջոցառումների գեղեցիկ շարք:
Անի Գրանդ հյուրանոցի «Պանորամիկ» սրահում տեղի ունեցավ հետաքրքիր պանելային քննարկում «Գինու տուրիզմ. Հայաստանի 6100 երանգները» խորագրով:
Քննարկմանը ներկա էին շուրջ 180 հյուրեր․ զբոսավարներ, տուրօպերատորներ, գինեգործարանների և գինու գաստրոբակերի ներկայացուցիչներ: Ներկաներին ողջունեցին ՊԶՀԱ նախագահ Յաշա Սոլոմոնյանը, ՀՀ Էկոնոմիկայի նախարարության Տուրիզմի կոմիտեի նախագահ Սիսիան Պօղոսեանը, Երևանի քաղաքապետարանի մշակույթի և զբոսաշրջության վարչության պետ Սեդա Աղբալյանը։
Բովանդակալից քննարկում ծավալվեց Հայաստանում գինու զբոսաշրջության զարգացման և Հայաստանը զբոսաշրջիկներին` որպես գինու հնագույն բնօրրան, ներկայացնելու հնարավորությունների մասին: Բանախոսներն էին՝ Տուրիզմի կոմիտեի նախագահ Սիսիան Պօղոսեանը, տ.գ.թ.,դոցենտ, խաղողագործության և գինեգործության մասնագետ Արտակ Գաբրիելյանը, Հայաստանի խաղողագործության և գինեգործության հիմնադրամի տնօրեն Զարուհի Մուրադյանը, GIZ-ի կողմից իրականացվող մասնավոր հատվածի զարգացում և ՄԿՈՒ Հարավային Կովկասի ծրագրի խորհրդատու Սիրվարդ Ամատունին և Հայաստանի գինիներ ՀԿ-ի նախագահ Լիլիթ Գրիգորյանը: Օրվա քննարկումները ևս մեկ անգամ փաստեցին, որ Հայաստանը, լինելով գինեգործական հնագույն կենտրոն, գինու զբոսաշրջության զարգացման մեծ ներուժ ունի:
Քննարկմանը հաջորդեց ՊԶՀԱ կողմից առաջին անգամ կազմակերպված «Հայ զբոսավարների ընտրություն 2023» մրցանակաբաշխությունը, որի ընթացքում Ասոցիացիայի անդամ զբոսավարների փակ քվեարկության արդյունքում մրցանակներ տրվեցին զբոսաշրջության ոլորտի տարբեր տնտեսվարողների՝ ութ անվանակարգերում։
Պանելային քննարկումից հետո Անի Գրանդ հյուրանոցի «Արենի» սրահում հյուրերը հնարավորություն ունեցան մասնակցելու գինու ցուցահանդեսին, որտեղ ներկա էին ավելի քան քսան գինեգործարանների և գաստրոբակերի ներկայացուցիչներ, ովքեր ներկայացնում էին իրենց փաթեթներն ու ծառայությունները: Իր տեսակի մեջ յուրահատուկ էր «Գինու կազինո»-յի առաջարկած ծառայությունը:
Միաժամանակ Հանրապետության Հրապարակից մեկնարկել էր ամենամյա ավանդույթ դարձած «Արի, գնանք Երևան» անվճար Էքսկուրսիաների շարքը, որի շնորհիվ ավելի քան 200 երևանցիներ ՊԶՀԱ զբոսավարների ուղեկցությամբ նորովի բացահայտեցին մեր մայրաքաղաքը:
Այս գեղեցիկ նախագիծն ամեն տարի իրականացվում է Երևանի քաղաքապետարանի զբոսաշրջության վարչության և Բասվոյաժ ընկերության աջակցությամբ:
Երեկոյան տոնական խնջույքը ՊԶՀԱ անդամների և հրավիրված հյուրերի համար տեղի ունեցավ Ֆիլինգեր հյուրանոցում։ Երեկոն լի էր անակնկալներով և նվերներով
Շնորհակալություն ենք հայտնում մեր հովանավոր գործընկերներին՝ Ani Grand Hotel-ին, GIZ-ին, Busvoyage ընկերությանը, Felinger հուրանոցին, Հայաստանի գինիներ ՀԿ-ին, Հայաստանի խաղողագործության և գինեգործության հիմնադրամին, իսկ տոնական օրվա անակնկալ նվերների համար`Azaria Winery-ին, Inspire chocolate-ին, Family Care Foundation Armenian Ceramics-ին, Felinger հյուրանոցի սպա կենտրոնին, Մաճառ ռեստորանին և Linopatum-ին։
